ორი ხორცი

ირაკლი შენგელიას ცხოვრებას განსაკუთრებით ერთფეროვანი არ ეთქმის, თუმცა თავად ამაში ღრმადაა დარწმუნებული და არც უკეთესის იმედი აქვს. ყველანაირი ენერგიისგან სრულიად დაცლილი, თვითონვე გრძნობს, როგორ მიექანება ფსკერისაკენ. მოულოდნელად ყველაფერი რადიკალურად იცვლება და ახალი რეალობა სრულიად გარდაქმნის პერსონაჟს. ამ მომენტიდან ნაწარმოები გადასხვაფერდება და ერთგვარად სარკის მეორე მხარეს აღმოვჩნდებით.

ლაშა მილორავას მორიგი რომანი „ორი ხორცი“ ქართული სალიტერატურო სივრცისთვის არცთუ ნაცნობ, ჩვენში ჯერაც დაუმკვიდრებელ ტრანსგრესიულ ჟანრს განეკუთვნება. აქამდე მიღებულ, სიუჟეტის ლოგიკური განვითარების ხაზს აცდენილი ეს მცირე რომანი ავტორის ახალ სიტყვად შეიძლება მივიჩნიოთ.