2024 წლის 26 მარტი ქართული ფეხბურთისთვის გარდამტეხ მომენტად იქცა. დამოუკიდებლობის ისტორიაში პირველად საქართველოს ნაკრები ევროპის ჩემპიონატის ფინალურ ეტაპზე გავიდა. ამ უმნიშვნელოვანესმა მოვლენამ მთელი ქვეყანა თითქოს ერთ გუნდად შეკრა და დიდ-პატარა ფეხბურთის თაყვანისმცემლად აქცია.

ჟურნალისტისა და ბლოგერის, არმაზ ახვლედიანის ეს წიგნი სწორედ ამ ისტორიული, „ევრო 2024“-ის დღიურია. თუმცა „ცოცხალი კედელი“ არ არის მხოლოდ კონკრეტული ევროტურნირის ყოველდღიურობის აღწერა, არამედ პირადი მოგონებებითა და გამოცდილებით შეზავებული ამბავი, რომელიც თავიდან ბოლომდე ფეხბურთთანაა გადაჯაჭვული. წიგნში თავმოყრილი მოგონებები ხელახლა გვაზიარებს პირველ ისტორიულ გამოცდილებას – როგორია, იყო საქართველოს ნაკრების გულშემატკივარი ევროპის ჩემპიონატზე.